ශ්‍රී ලංකාවේ විශාලතම අපනයනකරු මෙන්ම මෙරට පුද්ගලික අංශයේ විශාලතම සේවා යෝජකයා වන MAS Holdings විසින්, ශ්‍රී ලංකා රජය 2016 දී හඳුන්වා දෙන ලද හදිසි අනතුරු ප්‍රතිකාර සේවාවක් වන සුවසැරිය ගිලන්රථ සේවයට සහාය දැක්වීමට කටයුතු කර ඇත. MASහි අරමුණ සහ ප්‍රජාවට ඇති කැපවීම මනාව පිළිබිඹු කරමින් MAS හි ව්‍යාපාරික අංශ පහක් එක්ව කටුනායක, පන්නල, මහියංගනය, හොරණ සහ දොම්පේ යන ප්‍රදේශවල ගිලන්රථ සඳහා එලෙස අනුග්‍රහය දක්වා ඇත.
පුද්ගලයෙකුගේ ජීවිතය හා මරණය යන සාධකය තීරණය කෙරෙන තීරණාත්මක මොහොතේදී ගිලන් රථයක් අදාල ස්ථානයට පැමිණෙන වේලාව ඉතා තීරණාත්මක සාධකයක් විය හැකිය. සෞඛ්‍ය සේවා පහසුකම් සහ රෝහල් සඳහා පහසුවෙන් ප්‍රවේශ විය නොහැකි හෝ සීමා සහිත ප්‍රවේශයක් සහිත ප්‍රදේශවල මෙය විශේෂයෙන් තීරණාත්මක වේ. එම අවශ්‍යතාවය මැනවින් හඳුනා ගනිමින් MAS Active, MAS Intimates, MAS KREEDA, Bodyline සහ Linea Aqua යන MAS හි ව්‍යාපාරික අංශ පහ අවශ්‍යතා ඇති අයට සේවය කිරීම සඳහා මෙම සේවය නඩත්තු කර පවත්වාගෙන යාම වෙනුවෙන් රුපියල් මිලියන 25 ක අනුග්‍රාහකත්වයක් ලබා දී ඇත. මෙම ගිලන්රථ ආසන්න ප්‍රදේශවලට පමණක් නොව දිවයිනේ ඕනෑම ස්ථානයක ජාතික හදිසි අවස්ථාවලදී සේවය කිරීමට සූදානම්ව සහ සියලු පහසුකම්වලින් සමන්විතව ඇත.
සිය ප්‍රජාවන්ට සහයෝගය දැක්වීමට සහ ඔවුන්ගේ ජීවන තත්වයන් නගා සිටුවීමට සහාය විම සම්බන්ධයෙන් MASහට දිගු ඉතිහාසයක් ඇත. විශේෂයෙන් කොවිඩ්-19 වසංගත කාල සීමාවේදී ආසාදිතයින් සඳහා අංගසම්පූර්ණ වෛද්‍ය මධ්‍යස්ථාන පිහිටුවමින් ක්‍රියා කළ අයුරින් ඔවුන්ගේ කැපවීම මනාව පැහැදිලි විය. එහිදී MAS සාමාජිකයින්ට පමණක් නොව ඔවුන්ගේ පවුල්වල සාමාජිකයින් ඇතුළු පුළුල් ප්‍රජාවකට MAS සහයෝගය හිමි විය.
සුවසැරිය ගිලන්රථ නඩත්තු කර පවත්වාගෙන යාම සඳහා අනුග්‍රහය දක්වන මෙම නව ව්‍යාපෘතිය මගින්ද 67,000 කට අධික MAS හි ශ්‍රම බලකායට සහ ඔවුන්ගේ පවුල්වල සාමාජිකයින්ට පමණක් නොව සමස්ත ශ්‍රී ලාංකික ප්‍රජාවටම සුවිශාල ප්‍රතිලාභයන් හිමි වනු ඇත.
